Swing Festival 2021

ჩვენ მტკიცედ გვწამს, რომ სანამ ადამიანები

ცოცხლობენ, მათ გვერდით ხელოვნების

არსებობა უმნიშვნელოვანესია.“

პანდემიამ მნიშვნელოვანი დარტყმა მიაყენა ჩვენი ცხოვრების  ყველა ასპექტს, თუმცა, განსაკუთრებით მძიმე მდგომარეობაში კულტურის სფერო აღმოჩნდა, როგორც საქართველოში, ასევე გლობალურად. ის, რის გარეშეც ძალიან ცოტა ხნის წინ ცხოვრება წარმოუდგენელი იყო, სხვადასხვა ფორმით მხოლოდ ახლა ცდილობს დაბრუნებას.

ბოლო წლების განმავლობაში თბილისის ელექტრონული მუსიკის სცენამ განსაკუთრებული ადგილი დაიკავა გლობალურ კულტურულ რუკაზე, თუმცა პანდემიის მიერ გამოწვეულმა სირთულეებმა, ეს ნაშენები მიღწევები დიდი გამოწვევების წინაშე დააყენა: უდიდესი ფინანსური ზარალი მიადგათ კლუბებს და ფაქტიურად, დახურვის პირას მივიდნენ, არტისტების უმრავლესობა კი - შემოსავლის გარეშე დარჩა. 

წელიწადზე მეტია, რაც ქვეყნის მასშტაბით ყველა კლუბი დაკეტილია და ღონისძიებების ჩატარება ღია ცის ქვეშ შეზღუდული რაოდენობის დამსწრეებით და შეზღუდული დროით მხოლოდ ახლახანს გახდა ნებადართული. 

Swing Festival-ის იდეა პანდემიით გამოწვეული პრობლემების გადაჭრის წიაღში დაიბადა და ერთი წლის განმავლობაში მუშავდებოდა. ფესტივალის გუნდს, ერთი მხრივ, სურდა/სურს დაეხმაროს ადგილობრივ სცენას, რომელიც მრავალი სირთულის წინაშე დადგა და მეორე მხრივ - მსმენელს დაუბრუნოს ის მონატრებული გამოცდილება, რომელიც პანდემიამდე არსებობდა. 

„Swing Festival-ის მთავარი ღირებულება მეგობრობის, თავისუფლების და კულტურული მრავალფეროვნების პრინციპებზე დგას, რაც მიზნად ისახავს საზოგადოებისთვის შემოქმედებითი სულისკვეთების დაბრუნებას, ადამიანების ერთ სივრცეში, საერთო ინტერესების ქვეშ გაერთიანებას და მათთვის ახალი ცხოვრებისეული გამოცდილებების შექმნას. მუსიკას ნამდვილად აქვს ძალა, იყოს განსხვავებული სოციალური ფენის, ენის, თუ ეთნიკური წარმომავლობის ადამიანებისათვის საერთო შეხების წერტილი.“

 - ალექსანდრე ჯულაყიძე

დღესდღეობით, გლობალური ელექტრონული მუსიკის სცენის მთავარი გამოწვევა საცეკვაო მოედნების კვლავ უსაფრთხო ადგილებად ქცევაა. ამ კუთხით, ფესტივალს მკაცრად განსაზღვრული კოვიდ უსაფრთხოების გეგმა აქვს. ყველა სტუმარი ვალდებულია, წარმოადგინოს ბოლო 24 საათში ლაბორატორია მეგალაბში გაკეთებული უარყოფითი ანტიგენ ტესტის პასუხი, რომლის ჩატარებაც უფასოდ იქნება შესაძლებელი თბილისსა და ბათუმში. მხოლოდ ამ პროცედურების გავლის შემდგომ ეძლევა სტუმარს უფლება, რომ შევიდეს ფესტივალის ტერიტორიაზე.

მიგვაჩნია, რომ ჩვენს პროექტს შეუძლია შექმნას რეგიონალური პრეცედენტი იმისა, თუ როგორ შეიძლება ჩატარდეს მასობრივი კულუტურული ღონისძიება მაქსიმალურად უსაფრთხოდ, რაც, რა თქმა უნდა, წაახალისებს ქვეყნის კულტურულ ინდუსტრიას.“

 - ალექსანდრე ჯულაყიძე

გარდა უსაფრთხოებისა, ძალიან მნიშვნელოვანი იყო ფესტივალის ადგილმდებარეობაც. პროექტის ერთ-ერთი მთავარი მიზანი სწორედ ისეთი ადგილის პოვნა იყო, რომელიც ფართო აუდიტორიისთვის ჯერ არ იყო ცნობილი და რომელსაც უნიკალურ საფესტივალო ადგილად ჩამოყალიბების სამომავლო პერსპექტივა ექნებოდა.

ასეთი ადგილი აღმოჩნდა ოქროს ტბის მიმდებარე ტერიტორიაზე არსებული წყალ-სათხილამურო ბაზა, ქალაქ ფოთში. ამ უნიკალურმა კომპლექსმა 1991 წელს უმასპინძლა ევროპის წყალ-სათხილამურო სპორტის ჩემპიონატს. სწორედ ეს იყო ყველაზე დიდი და, ამავდროულად, ბოლო მნიშვნელოვანი ტურისტული მოვლენა ამ ქალაქში.

„ფოთი დიდი ისტორიის ქალაქია, რომელსაც აქვს უდიდესი პოტენციალი გახდეს კიდევ ერთი მნიშვნელოვანი კულტურული და ტურისტული ადგილი ჩვენს ქვეყანაში. ოქროს ტბის მიმდებარე ტერიტორიის ნახვისთანავე დარწმუნებულები ვიყავით, რომ ჩვენი საფესტივალო პროექტი სწორედ აქ უნდა განხორციელებულიყო. გვჯერა რომ ის ისეთივე შთამბეჭდავი იქნება სტუმრებისთვის, ისევე როგორც ჩვენთვის.“

 - ალექსანდრე ჯულაყიძე

ფესტივალის გუნდი დარწმუნებულია, რომ ეს ქალაქისთვის მნიშვნელოვანი  ღონისძიება იქნება, რომელიც შეუწყობს ხელს ფოთის კულტურულ და ტურისტულ განვითარებას.

„იმედი გვაქვს, რომ Swing Festival იქნება ბიძგი, რომ ფოთმა აქტიურად უმასპინძლოს სხვადასხვა კულტურულ ღონისძიებებს და ამ კუთხით გაიზარდოს ინტერესი, როგორც სტუმრების, ასევე ადგილობრივი მოსახლეობის მხრიდან.“

- ლაშა მარგიანი

ანტიკურ ფაზისში, ფესტივალი სტუმრებს 30 ივლისს, 18:00 საათიდან გაუღებს კარს და სამი დღის განმავლობაში შეეცდება საუკეთესო საფესტივალო გამოცდილება შეუქმნას.  

აღსანიშნავია ისიც, რომ ვინაიდან ფესტივალის მთავარი იდეა ადგილობრივი სცენის დახმარება და ხელშეწყობა იყო, ლაინაფის უმრავლესობას ადგილობრივი არტისტები წარმოადგენენ, რომლებსაც რამდენიმე კარგად ნაცნობი უცხოელი არტისტი შეურთდება. 

მუსიკოსები უწყვეტ რეჟიმში სამ სცენაზე დაუკრავენ:


Pool Stage-ზე ადგილობრივი სცენის წარმოამდგნელებთან ერთად, პიონერი დიჯეი და პროდიუსერი DVS1 დაუკრავს, თელ-ავივის სცენის ერთ-ერთ ყველაზე გამორჩეულ არტისტ, Anna Haleta-სთან ერთად.


Tsa Stage-ს დაიკავებენ ლეიბლ გიგლინგის თანადამფუძნებელი Edward და DJ Dustin, Francesco Del Garda-სთან და Jane Fitz-თან ერთად.


Beach Stage-ზე კი ადგილობრივ არტისტებთან ერთად Evan Baggs, Dr.Banana B2B Alec Falconer და Amichay Matias დაუკრავენ. 

„ფესტივალის მთავარი ამოსავალი წერტილი ადგილობრივი სცენის მაქსიმალური მხარდაჭერა იყო. ჩვენი მიზანია, რომ არტისტებმა მოახერხონ როგორც ფინანსური, ასევე ემოციური რეინვესტირება კოვიდ პანდემიის შემდეგ, კვლავ მოახერხონ საყვარელი საქმის კეთება ხელოვნურად გამოწვეული სირთულეების გარეშე.“

- ლაშა მარგიანი

სრული ლაინ აიფისთვის და ყველა დამატებითი ინფორმაციისთვის ეწვიეთ ფესტივალის ფეისბუქ გვერდს - https://www.facebook.com/swingfestival

ბილეთების

შესაძენად - https://eventer.ge/event/swing-festival-2021/1491/en

ფოტო: ალექსანდრე ბაგრატიონ-დავიდოვი