Natalie Beridze - V Formation

ნატალია ბერიძის ახალი 3 ტრეკიანი EP სიმებიანი ორკესტრისთვის - კომპოზიციები ერთ-ერთ ყველაზე საოცარ სანახაობას, ჩიტების გუნდის მურმურაციას ეძღვნება, პარადოქსულად სწორედ ჩიტებია ნატალიას ერთ-ერთი ცხოვრებისეული ფობიაც.

GRB3 - This LIfe Like a Comet

ამ პროექტს წარდგენა აღარ ჭირდება, უკვე იმდენჯერ მოხვდა თვის მუსიკალურ სიაში. მათი მეხუთე ალბომი წინების მსგავსია, თუმცა არის მნიშვნელოვანი განსხვავებებიც. კომპოზიციების ნაწილი ნაკლებად ქაოტურია, თუმცა მაინც ინარჩუნებს ავანგარდისთვის დამახასითებელი თავისუფალ სულს - ოთხეულს ამჯერად ტატო ნოზაძე ემატება ბანსურიზე.

My Equinox Divine - JOY

My Equinox Divine - ეს დუეტი ქართულ მუსიკალურ სცენაზე სხვადასხვა სახელით უკვე 17 წელზე მეტია რაც აქტიურობს, თანაც განსხვავებულ ჟანრებში. ბოლო პერიოდის განმავლობაში კი სწორედ ამ ელექტრო/არტ პოპ პროექტის ფარგლებში ქმნიან მუსიკას. “JOY” მათი მორიგი 3 ტრეკიანი EP-ია.

ke ti - NEXT STATION

ქეთი ალექსიშვილის მუსიკა ჩემთვის მარტამდე ნამდვილად უცნობი იყო - აღნიშნულ მინიალბომში მუსიკოსი საინტერესო ემოციურ პასაჟებს იჭერს და უფრო მეტის მოსმენას განდომებს. იმედია ახალი მუსიკაც მალე გახდება საჯარო.

Mindori – MINDORI

Mindori Toysop Records-ის კიდევ ერთი პროექტია - კიდევ უფრო მეტი ხმაურითა და სასიამოვნო აურზაურით, არეული გიტარა, ჩატეხილი რიტმები, დამახინჯებული ვოკალური ნაწილი - ამ მიმდინარეობას საქართველოში ჰყავს მცირე, მაგრამ მაინც აქტიური გულშემატკივარი.

Aria - შენ ქალაქიდან

Aria - თბილისის მუსიკალური სცენის აქტიურ წევრებს მოიცავს, მათ შორისაა დათა კაციტაძე, რომელიც რამდენიმე პროექტიდან უკვე იცის მსმენელმა. მუსიკა EP-დან „შენი ქალაქიდან“ უფრო რბილი და მელოდიურია, მომენტებში ლეგენდარული indie rock ბენდი, Pavement გამახსენა.

VAQO - Anhedonia (idiotizmis pikshi khar)

ანჰედონია - ეს სინდრომია, რომლის დროსაც ადამიანი ვერ განიცდის სიამოვნებას იმ საქმიანობიდან, რომელიც ჩვეულებისამებრ სიამოვნების მომგვრელია. სწორედ ასე არის დასათაურებული ვახტანგ ქანთარიას ორღანის და გიტარის აქტიური მოქმედებით დატვირთული ახალი სინგლი.

Anuka Kipshidze – Ma Tsa De

განსაკუთრებული აღმოჩენა აღმოჩნდა ჩემთვის ბასისტის და პროდიუსერის ანუკა ყიფშიძის მუსიკა, რომელიც შემიძლია ვთქვა რომ ნამდვილად უნიკალური ხმაა ქართულ მუსიკაში. მის სადებიუტო ალბომში ისეთი ჟღერადობას შეხვდებით, რაც აქაურ სივრცეში იშვიათად თუ გამოჩნდება. სადღაც Squarepusher-სა და Iglooghost-ს შორის - ხმოვანი ქაოსი, რომელიც ზოგჯერ სიმშვიდესაც ჯობია.

Tamarma – Cold Comfort

მუსიკოსის და პროდიუსერის, თამარა დავითაშვილის სადებიუტო EP Toyscop-ზე - მუსიკა დასაწყისისთვის მისტიურ ატმოსფეროს ქმნის და შესაბამის სცენარს ხაზავს მსმენელის გონებაში, განვითარებასთან ერთად კი ამას არასტანდარტული რიტმული სექციებიც ემატება - ხუთივე კომპოზიციას ეტყობა რომ საბოლოო პროდუქტის მისაღებად ბევრია ნამუშევარია ხმის დიზაინსა და ფაქტურაზე, რაც თავის მხრივ ხშირად არ გვხვდება ქართულ სივრცეში.

fafa – Cup Care

შედარებით ახალი მუსიკალური პროექტი - როგორც აღწერიდან ვკითხულობთ, ბიჭი გიტარით და ინდი მუსიკის განსაკუთრებული სიყვარული. ეს ამ სადებიუტო ალბომიდანაც ჩანს - განსაკუთრებით იგრძნობა Pavement-ის გავლენა, თუმცა სივრცე ინდივიდუალური მუსიკალური განვითარებისთვის კვლავ რჩება.

The Polar Monk – Forget About Your Morning

თბილისური ბენდის, Polar Monk-ის ეს ნამუშევარი სრულიად განსხვავებულია მათი წინა სინგლებისგან - თითქოს ბენდის ფორმატიც სადღაც გაქრა და გზა დაეთმო ექსპერიმენტების დიდ ტალღას.

Black Dust - Katorga on a Distant Planet

Black Dust ახალი ორკაციანი Death Metal ბენდია თბილისიდან. მათი სადებიუტო გამოცემა, ჟანრისთვის დამახასიათებელი საგიტარო რიფებს, ატმოსფერულ სოლოებს და ტონალობა შეცვლილ ვოკალებს მოიცავს - ტექსტობრივი ნაწილი კი ფუტურისტულ, პოსტ-აპოკალიპტურ სცენარებს გვიტახავს.

Machara – Stuka

ახალგაზრდა ბითმეიქერის სადებიუტო მინიალბომი, 90-იანების გამორჩეულ ჟღერადობას ქართულ კონტექსტში აცოცხლებს, ამაში კი მას მეგობარი MC-ები ეხმარებიან. 

Dynamo-81 - Brutal Summer

Toysop-ის ტრადიცია - ასე შეგვიძლია დავარქვათ Dynamo-81-ის მუსიკალურ ფორმას, რომელიც ჰგავს ლეიბლის სხვა ფორმაციებს, თუმცა საკუთარი უნიკალური ხელწერაც გააჩნია. რა თქმა უნდა, სახელი ლეგენდარული საფეხბურთო ზეიმიდან მომდინარეობს, თუმცა მუსიკა ფეხბურთის იმ მატჩზე მეტად ბრუტალურია და 70-იანი წლების ექსპერიმენტული როკის საწყისებთან მივყავართ.

ავტორი: ჯაბა შავიშვილი

Powered by VISA