სიახლეები ბიზნესი

როგორ შეიქმნა თიბისი კონცეპტის ვიზუალური სტილი

TBC CONCEPT

სექტემბერი 02, 2020

ტრანსფორმაცია და ცვლილებები ჩვენი ცხოვრების განუყოფელი ნაწილი და აუცილებლობაა. ჩვენ ყოველდღიურად უამრავ ინფორმაციას ვიღებთ და ვამუშავებთ, შემდეგ კი შესაბამის გადაწყვეტილებებს ვიღებთ. ადამიანის მოთხოვნილებებისა და სურვილების სწრაფი ცვალებადობა ბუნებრივია, რომ კომპანიების სტრატეგიული ხედვისა და სერვისების ცვლილებებსაც იწვევს. სწორედ ამის მაგალითია თიბისის განახლებული პერსონალური საბანკო მომსახურება - თიბისი კონცეპტი.  


დღევანდელი პროდუქტები, პირველ რიგში, ფუნქციონალური ნაწილით იმკვიდრებენ ადგილს. ბრენდი კი ფუნქციონალთან ერთად, პროდუქტის დე-ენ-ემის, მიზნებისა და იდენტობასთან ერთად იბადება. თიბისი კონცეპტის თითოეული ბრენდ-ატრიბუტიც პროდუქტის არსზე ხანგრძლივი დაკვირვების, ფიქრისა და შრომის შემდეგ შეიქმნა. 

თიბისი კონცეპტის ვიზუალურ ბრენდინგზე პროდუქტების განვითარებისა და ბრენდინგის ქართველმა სპეციალისტმა, ერეკლე ინაშვილმა იმუშავა. ერეკლე უკვე მრავალი წელია მიუნხენში ცხოვრობს და გერმანულ ბაზარზე სხვადასხვა ბრენდის შენებაზე მუშაობს. მანძილისა და დატვირთული სამუშაო გრაფიკის მიუხედავად, ერეკლე საქართველოსთან კავშირს ინარჩუნებს და ცნობილ ქართულ ბრენდებს განვითარებაში ეხმარება. 

ბრიფიდან პირველ მონახაზამდე

ერეკლე ინაშვილი იხსენებს იმ დღეებს, როდესაც თიბისი კონცეპტის პირველი ბრიფი მიიღო. თავდაპირველად პროცესი ერთი არსებული პროდუქტის გარდაქმნას გულისხმობდა, თუმცა მუშაობის პროცესში, გუნდი მივიდა დასკვნამდე, რომ საჭირო იყო ახალი რეალობის გათვალისწინება, მომხმარებელზე მეტად ორიენტირება, პერსონალიზაცია და ადამიანზე-ცენტრირებული სერვისის შექმნა. ახალმა მიზანმა დავალება მთლიანად შეცვალა. სწორედ აქედან დაიწყო თიბისი კონცეპტის ფორმირება სრულიად განსხვავებულ, თანამედროვე მიდგომად.


მუშაობის პროცესში მივხვდით, რომ უნდა შეგვექმნა ახალი კონცეფცია, რომელიც არსებულ დამოკიდებულებას ასეთი პროდუქტებისადმი სრულად შეცვლიდა, პროდუქტს კი უფრო თანამედროვეს გახდიდა. ძველი მიდგომა, სადაც პროდუქტი თავად კარნახობს მომხარებელს თამაშის წესებს, აღარ მუშაობს. საჭიროა მეტი სისხარტე, პირდაპირობა და გულწრფელობა მომხარებელთან; მისი ცხოვრების სტილის, ინტერესების, საჭიროებების შესწავლა და იმ ბრენდის ხასიათის შექმნა, რომელსაც ადამიანებისთვის კონკრეტული სარგებელი მოაქვს და რომელიც ყოველდღიურობას ამარტივებს““ 


- ერეკლე ინაშვილი

ასეთი მიდგომა დასაწყისშივე გამორიცხავდა ისეთი სერვისის შექმნას, რომელიც ერთდროულად ყველა ადამიანზე ერთნაირად იქნებოდა მორგებული და მათ ინდივიდუალურ არჩევანს წაართმევდა. ამ მიზნის გადმოტანა ვიზუალურ ნაწილში სწორედ ერეკლეს სამუშაო იყო. 

“ჩვენ ვმუშაობდით პროდუქტზე, რომელიც განკუთვნილია არა ერთი სქესის, ასაკობრივი ჯგუფის ან ხასიათის მომხმარებლისთვის, არამედ, რომელიც უნდა მოერგოს ადამიანის ინდივიდუალურ მოთხოვნილებებს; იყოს ძალიან მოქნილი და ამასთანავე ჰქონდეს მკაფიოდ გაწერილი შიდა სტრუქტურა.”


ერეკლესთვის მნიშვნელოვანი იყო შეექმნა დინამიური ორგანიზმი ბრენდის სახით, რომელიც თავისუფალ სივრცეს მისცემდა თითოეულ მომხმარებელს მისი პირადი „კონცეპტისთვის“. ცხოვრებაში ყველას ჩვენი პირადი კონცეფცია გვაქვს, რაც იმას ნიშნავს, რომ ყოველდღიურად ერთმანეთისგან განსხვავებულ გადაწყვეტილებებს ვიღებთ. დღეს სწორედ ამ პრინციპს ეყრდნობა ყველა თანამედროვე კომპანია. ჩვენი საყვარელი ბრენდები, მაგალითად Apple და Netflix, დამატებით შესაძლებლობებს ქმნიან, რომ საკუთარ თავზე მოვირგოთ მათი პროდუქტი და ზედმეტად არ შეგვაწუხოს ბრენდის საკომუნიკაციო მესიჯებმა და შეფუთვამ.

“თიბისი კონცეპტის მიზანი იყო, მომხარებელები ინდივიდუალური საჭიროებების გარშემო გაეერთიანებინა და ამისთვის მათთვის განსხვავებული ნაკრებები შეეთავაზებინა. ეს ყველაფერი ვიზულაურ იდენტობაში აისახა. ერთი მხრივ მივიღეთ საერთო, გამჭვირვალე ჩარჩო და ასევე ინდივიდუალური „ლეიბლები“ განმასხვავებელი ფერებითა და ვიზუალური ხელწერით.“ 

ფერები და მარკები

თიბისი კონცეპტის ვიზუალური ბრენდინგის შექმნამ რამდენიმე ეტაპი გაიარა, თუმცა პირველ რიგში უნდა გამოვყოთ ფერები და მარკები (ლეიბლები), რომლებიც მას ყველასგან გამორჩეულს და დამახასიათებელს ხდის. ერეკლე ინაშვილი გვიყვება, რომ მარკების სისტემის შექმნა თიბისი კონცეპტის არქიტექტურის დალაგებას გამოხატავს, ხოლო ფერები, რომლებიც მარკებს ერთმანეთისგან განასხვავებს, იმ ნაკრებების მრავალფეროვნებას აღნიშნავს, რომლებსაც ახალი კონცეფცია მომხმარებლებს სთავაზობს. 

„ამ მიდგომით ბრენდი ძალიან ახლოს მივიდა ადამიანებთან, რადგან შექმნა არჩევანი ვიზუალურ სამყაროებს შორის. კონკრეტული ნაკრების „ლეიბლი“ მომხმარებლის არჩეულ ცხოვრების სტილს ეხმიანება.“


თიბისი კონცეპტის მომხმარებელს არჩევანის საშუალება აქვს - სერვისების ციფრულად, დისტანციურად მიღება ურჩევნია, თუ ბანკირთან პირისპირ კომუნიკაცია. სწორედ ეს არჩევანია გათვალისწინებული თიბისი კონცეპტის ვიზუალურ იდენტობაშიც.

ჩარჩო და გრადიენტი

თიბისი კონცეპტის ვიზუალური დე-ენ-ემის შექმნის კიდევ ერთი მნიშვნელოვანი ფაქტორი, მისი წარმომავლობაა.

“თიბისი კონცეპტი დამოუკიდებელი პროდუქტია, რომელიც უნიკალურ მომსახურებას სთავაზობს მომხმარებლებს, თუმცა მას ზურგს უმაგრებს ძლიერი ბრენდი თიბისის სახით. ჩარჩოში თიბისის სამკუთხედი სიმბოლო და ფერთა გამა, რომელიც ცისფერ და ლაჟვარდისფერ ტონებშია გადაწყვეტილი, თიბისის გენეტიკაზე მიუთითებს.“

ფონტი და ხელწერა

თიბისი კონცეპტის ბრენდ-იდენტობა ქართულ და ლათინურ ვერსიებს აერთიანებს. ქართული ვერსია უკვე არსებული ლათინური შრიფტის ანალოგზე დაყრდნობით შეიქმნა და ქართულად ადაპტირდა.

“შეგნებულად არ გამოვიყენეთ ბეჭდური სერიფიანი შრიფტი, რაც ბრენდის თანამედროვეობაზე და მომხარებელთან „შენობით“ კომუნიკაციას უსვამს ხაზს. ლათინური ფონტი - Nexa, რომელიც ერთი მხრივ, მარტივი, თანამედროვე  და პირდაპირია, მეორე მხრივ კი ინდივიდუალობა გააჩნია, საკუთარ ხასიათს ატარებს. კონცეპტის ფონტმარკის ქართულ ადაპტაციაზე ტიპოგრაფიაში მოღვაწე დიზაინერმა - ლაშა გიორგაძემ იმუშავა და კარგად გაართვა თავი ამოცანას - შეენარჩუნებინა Nexa-ს ხასიათი.”


ყველა ეს დეტალი თუ ბრენდ-ატრიბუტი კონცეპტს დაეხმარება მომხმარებელთან ერთიანი ხელწერით შეკრული კომუნიკაცია დაამყაროს და მის ცნობიერ თუ არაცნობიერ არჩევანში საკუთარი ადგილი დაიმკვიდროს. 

“მთლიანობაში, თიბისი კონცეპტი სრულიად ყოვლისმომცველ ბრენდ-კონსტრუქტად ჩამოყალიბდა, რომელიც, ჩემი აზრით, წლების მანძილზე თანამიმდევრულად შექმნის მომხმრებლებისთვის ძლიერ გამოცდილებას; რომელსაც დიზაინ-სისტემის ხარჯზე ყოველი შემდეგი ნაბიჯი თუ ეტაპი გაწერილი აქვს, როგორც ციფრულ, ასევე ფიზიკურ სამყაროში წარმატებული სასიცოცხლო ციკლისთვის.


ავტორი: დიმა სანაია