დეკემბერი 01, 2021
დებიუტი ლიტერატურული პრემია „საბას“ ყველაზე მნიშვნელოვანი ნომინაციაა, ეს ერთდროულად აწმყოცაა და მომავალიც, ის, რაც ამ წუთში ხდება და ის, რაც მოხდება შემდეგ წლებში. როგორც წესი, დებიუტში წარმოდგენილი წიგნების ავტორები რამდენიმე წლის შემდეგ ახალი წიგნებით უბრუნდებიან მკითხველს, ახალი გამოცდილებითა და ცოდნით, ახალი შთაგონებით, უფრო დაოსტატებული, გამოცდილი, მკითხველის ცეცხლში გამოწრთობილი ავტორები.
ეს კატეგორია კიდევ იმითაა საინტერესო, რომ ჟანრობრივად მრავალფეროვანია, მთავარი აქ პირველად წაკითხვის ბედნიერებასთან ერთად პირველი გაბედვის, ნაყოფის პირველი მოწევის, პირველი მოსავლის ბედნიერებაა.
მაშ, ასე, წელს რას ველით ამ ნომინაციისგან?
ირინე ტაბაღუა - „ტელეფას ცხვარი“
გამომცემლობა „ინტელექტი"
ბოლო დროს, სულ უფრო და უფრო ხშირად ვლაპარაკობთ, რომ ლიტერატურას ქალის ხმით, ქალის ხედვით აღქმული სინამდვილე აკლია. ლიტერატურის ისტორია მრავალ დადუმებულ ქალს იცნობს, მათ შორის, ქართული ლიტერატურული გამოცდილებაც. მითუმეტეს, თუ ქალები საკუთარ თავზე, შეგრძნებებზე, სექსუალობაზე ხმამაღლა ლაპარაკობენ. ირინე ტაბაღუას „ტელეფას ცხვარი“ ქალის მანიფესტია, ხმამაღალი პროტესტი ქალისა, რომელიც ყველა იმ ქალის ნაცვლად ლაპარაკობს, რომლებიც სხვადასხვა დროს დაადუმეს.
ნანა აბულაძე - „აკუმი“
გამომცემლობა „ინტელექტი“
ქართული ლიტერატურა სულ უფრო და უფრო მეტად უსინჯავს კბილს სამეცნიერო ფანტასტიკას, განსაკუთრებით ამ მხრივ ახალგაზრდა ავტორები გვახარებენ. წელს „საბას“ დებიუტის ნომინაციაში ძალიან საინტერესო რომანია წარმოდგენილი, რომლის ავტორი ახალგაზრდა პროზაიკოსი, ნანა აბულაძეა. რისი მეტაფორაა აკუმი? ადამიანის, რომელიც თავის თავს ეძებს, თანდათან იძერწება, იხატება, იწერება და პოულობს საკუთარ სულს, თუნდაც სიკვდილის ფასად.
ლიტერატურის ისტორია მოგზაურობის ამბით იწყება, გილგამეში თუ ოდისევსი, ადამიანი და გზა, გზა სხვა სივრცეებისა და საკუთარი თავისკენ.
კახაბერ მელითაური - „მოგზაურობა ნამცეცებს შორის“
ნოდარ დუმბაძის გამომცემლობა და ლიტერატურული სააგენტო
დებიუტის ნომინაციაში კიდევ ერთი განსაკუთრებული ლიტერატურული მოგზაურობაა წარმოდგენილი, კახა მელითაურის „მოგზაურობა ნამცეცებს შორის“, უძველესი ამბავი ადამიანისა, რომელიც გზებს, დღეებს და საკუთარ თავს აგროვებს.
ნიკოლოზ ცისკარიშვილი - „ცეცხლისწამკიდებელი“
გამომცემლობა „პალიტრა L”
ნიკოლოზ ცისკარიშვილის ეს ემოციუი გაქცევაც უძველესი ლიტერატურული ფაბულააა, განდევნილი თუ გაქცეული ადამიანი, მდევარი, რომელიც თითქოს უკვე ზურგთან სუნთქავს, „დამალვას აზრი არ აქვს, უკვე შეამჩნიეს. მადლობა ღმერთს, ჯერ კიდევ შორს არის, ორი ან სამი საათის სავალზე, მაგრამ მაინც უნდა იჩქაროს.“
რას გაურბის ან საითკენ აქვს პერსონაჟს გეზი? ეს ემოციური, რიტმული ტექსტი მკითხველს აუცილებლად წაიყოლებს ამ გზაზე.
პრიმო ლევის„პერიოდული სისტემა“ - მთარგმნელი: ნათია აბრამიშვილი
დიოგენე
პრიმო ლევის „პერიოდული სისტემა“ იმ მკითხველისთვისაა, ვისაც სჯერა, რომ სიტყვების პერიოდული სისტემა კიდევ უფრო მწყობრი და ლოგიკურია, ვიდრე ქიმიური ელემენტების, რომ ადამიანთა ცხოვრება ერთი დიდი სუბსტანციის შემადგენელი ნაწილია, რომ ლიტერატურა ყველგანაა, ისევე, როგორც ელემენტები.
ეს გენიალური წიგნი ნათია აბრამიშვილმა თარგმნა და ამით დიდ ლიტერატურასთან წვდომის კიდევ ერთი საშუალება აჩუქა მკითხველს, რომელიც თავადაც ამ დიდი ლიტერტაურული სისტემის უმნიშვნელოვანესი შემადგენელი ნაწილია.
„უზარმაზარ გაჭვარტლულ ოთახში ისე შევედით, როგორც ღვთის სახლში შედის მორწმუნე. შარშანდელი ლაბორატორია ახლა ბავშვურ გასართობად გვეჩვენებოდა, იქაური საქმიანობა კი სახლობანას თამაშს ჰგავდა. თუმცა, ასე იყო თუ ისე, იქ რაღაც მაინც ვისწავლეთ და უკანასკნელი ჩერჩეტი უნდა ყოფილიყავი, რომ მაგნეზიტიდან მაგნიუმის სულფატის ან ბრომიდან კალიუმის ბრომიდის მიღება ვერ აგეთვისებინა.“
მოკლედ, წელსაც, ისევე, როგორც ყოველთვის, ახალი, კაშკაშა ავტორების წიგნებს ვკითხულობთ და ველით, მაინც ვინ იქნება ის ერთადერთი, რომელიც წლის ყველაზე იღბლიანი დებიუტანტის სახელს მოიპოვებს?
ავტორი: „საბა"
ფოტო: გურამ წიბახაშვილი, თინათინ კიღურაძე