ქუთაისი ისტორიული ქალაქია. არა მხოლოდ იმ მდიდარი ისტორიული წარსულის გამო, რომელიც საუკუნეების განმავლობაში დაგროვდა, არამედ იმიტომაც, რომ აქ ყოველი ფეხის ნაბიჯზე შეხვდებით ისტორიას, რომელიც აქაურია, ავთენტურია და მხოლოდ ქუთაისმა იცის.

© გიორგი ნაკაშიძე

© გიორგი ნაკაშიძე

ეს მხოლოდ საფეხბურთო გუნდი არ არის ამ ქალაქისთვის. ყველა ადამიანსა და ყველა სკამს ტრიბუნაზე განსაკუთრებული ისტორია უკავშირდება - იუმორნარევი, გულიანი და რაც მთავარია, სიყვარულით სავსე. ამ ისტორიების ნაკრებია ქუთაისის ტორპედო და არა მხოლოდ ფეხბურთელების გვარების.

© გიორგი ნაკაშიძე

იცის პირობის დადება და გამარჯვების შემთხვევაში შესრულება. თავისი გუნდის ღირსეული დახვედრაც იცის და მოწინააღმდეგისაც.

© გიორგი ნაკაშიძე

ქუთაისმა იცის იმ ადამიანების დაფასება რომლებსაც ტორპედოს ისტორიაში მნიშვნელოვანი როლი მიუძღვით. მათთვის საყვარელ ადგილსაც გამორჩეული ლეგენდის რამაზ შენგელიას სახელი დაარქვეს.

© გიორგი ნაკაშიძე

ახსოვთ ძოძუაშვილის და ყიფიანის მწვრთნელობისას მოგებული საქართველოს ჩემპიონატი - ზედიზედ სამჯერ. მესამე გამარჯვების ისტორიას კი თითქმის ყოველდღე იხსენებენ.

ქუთაისმა ერთგულებაც იცის და ეს ყველაზე კარგად იმ წლებში დამტკიცდა, როცა გუნდი წარმატებას ვერ აღწევდა და სხვადასხვა მიზეზების გამო უფრო დაბალ დივიზიონშიც დაქვეითდა. ამ დროს “ტორპედო” გულშემატკივარმა არ მიატოვა, ყველაზე მძიმე დროს გუნდს გვერდით დაუდგა და სირთულეების გადალახვაშიც ლომის წვლილი შეიტანა.

© გიორგი ნაკაშიძე

ფანების მოგებული თამაში იცით?

აი, ქუთაისმა იცის, გაუკეთებიათ ბევრჯერ.

© გიორგი ნაკაშიძე

მატჩის დღეს ქუთაისელები მხოლოდ საფეხბურთო კლუბს არ გულშემატკივრობენ, ისინი თავიანთ საყვარელ ქალაქს ქუთაისს გულშემატკივრობენ.

ამიტომაც არის ეს ადგილი პატარა ქუთაისი - აქ გვხვდება ყველაფერი ის, რაც ქუთაისში და ქუთაისელებში გვიყვარს.

ასეთი ქალაქია ქუთაისი და ასეთი გუნდია ტორპედო.

ავტორი: დავით კილაძე

ფოტო: გიორგი ნაკაშიძე