“ცალკეული მუსიკა და ჟღერადობა არ იმსახურებს ერთ სივრცეში გამოკეტვას, ზოგჯერ მას უფრო მეტი თავისუფლება სჭირდება. როდესაც წვეულება ღია ცის ქვეშ იმართება, გარემო მუსიკას ახალ შრეებს უმატებს. რა თქმა უნდა, მიყვარს კლუბებში დაკვრა, მაგრამ მზის ამოსვლისას ან ჩასვლისას დაკვრა და ამ პროცესის საუნდტრეკის შექმნა ჩემთვის განსაკუთრებული გამოცდილებაა.” 

ღონისძიებების სერია All Day I Dream Lee Burridge-ს მენტორობით 2011 წელს, ნიუ იორკში, დახურული წვეულებების ფორმატში დაიწყო და მალევე საერთაშორისო ფენომენად იქცა. გამორჩეული ვიზუალური სტილის, საინტერესო სელექტორების და მრავალფეროვანი მუსიკალური პალიტრის დამსახურებით All Day I Dream საფესტივალო კულტურის ნამდვილ მარგალიტად იქცა. ამიტომაც გასაკვირი არც არის, რომ Lee Burridge-მა ეს იდეა ერთი კონკრეტული ქალაქის ან ქვეყნის საზღვრებში არ დატოვა და გლობალური მუსიკალური ლანდშაფტის გამდიდრება დაიწყო.

“ჩემი მიზანი იყო, რომ მუსიკალურ ღონისძიებებში ახალი ელემენტებით გამემდიდრებინა და დეკორაციად მეტალის ნივთების ნაცვლად ბუნებრივი კომპონენტები შემომეტანა. ნიუ იორკის კლუბებში ბრუტალური ელემენტები ისედაც დომინირებდა და ამ მიდგომით მსურდა ბუნებრივი ბალანსი შემექმნა."

All Day I Dream-ის ერთი სიტყვით დასახასიათებლად ყველაზე სწორი ტერმინი ალბათ “ბალანსია”, რადგან საქმე გვაქვს ისეთ ფენომენთან, სადაც ხელოვნების რამდენიმე შრე ერთიანდება და ყველანაირ საზღვარს კვეთს. როდესაც Lee Burridge და მისი მეგობრების წვეულებაზე მიდიხარ, იცი, რომ მუსიკა, როგორც მთავარი სახელოვნებო ენა, მთავარი პრიორიტეტია, მაგრამ ყველაფერი აქ არ მთავრდება. შენ ემზადები უნიკალური გამოცდილებისთვის, რომელიც როგორც ფიზიკურ, ასევე მენტალურ გამოწვევებს გიმზადებს. 

Lee Burridge პირველ რიგში დიჯეია, შემდეგ კი მუსიკალური პროდუსერი, რაც იმას ნიშნავს, რომ მას აუდიტორიასთან ურთიერთობა ცოცხალ გარემოში ურჩევნია და არა სტუდიიდან, სადაც არტისტი ყოველთვის იზოლირებულია. 

All Day I Dream-ის დაარსების გარდა, მისი სახელი მუსიკალურ რუკაზე ფესტივალ Burning Man-ზე დაკრული საკულტო სეტებით და Organic House სტილის განვითარების შედეგად მოინიშნა. წლებთან ერთად, მუსიკისა და ბუნების ურთიერთკავშირის ძიების პროცესში, ბრიტანელი მუსიკოსი თავისი თაობის ერთ-ერთ მთავარ მუსიკალურ ექსპერიმენტატორად იქცა. 

ზედმეტი პათეტიკის გარეშე შეგვიძლია ვთქვათ, როგორც თავად არტისტის, ასევე მისი წვეულებების სერიის მთავარი მუსიკალური ხაზი მელოდიურობასა და ემოციურობაზე გადის. ეს არ ნიშნავს, რომ მისი მუსიკა ზედმეტად დრამატიზებულია ან აბსტრაქტული იდეებით არის დამძიმებული. არა, ის ყოველთვის ცდილობს შეინარჩუნოს სიმსუბუქე და შექმნას ატმოსფერო, რომელსაც მსმენელი ბოლომდე მიენდობა. მუსიკა, როგორც შემეცნების და თვითგანვითარების გზა, Lee Burridge-თვის შეუცვლელი კონცეპტია.

ამ იდეას საინტერესოდ ემსახურება “სოციალური სივრცე” - მულტიფუნქციური სივრცე შეკვეთილში, რომელიც All Day I Dream-ის ოჯახს 17 აგვისტოს უკვე მეორედ მასპინძლობს. ამ სივრცის მიზანია ადამიანებს დაეხმაროს შინაგანი ჰარმონიის პოვნაში, რომელიც სიმშვიდის და სტაბილურობის შეგრძნების მთავარი წინაპირობაა. 

ყოველდღიურ ცხოვრებაში დაგროვილი სხვადასხვა ტიპის ენერგიის პოზიტიური მიმართულების მიცემა ის მიზანია, რომელიც როგორც სოციალურ სივრცეს, ასევე All Day I Dream-ის ღონისძიებებს აერთიანებს.

შეკვეთილში Lee Burridge-ს გარდა Lost Desert, Amonita, Fulltone და Jim Rider-ის მოსმენა იქნება შესაძლებელი. Lost Desert ბელგიელი მუსიკოსის და დიჯეის, Patrick Bruyndonx-ის სასცენო ფსევდონიმია. მისი შემოქმედებითი საქმიანობა ზედმიწევნით იმეორებს იმ პრინციპებს, რომელიც All Day I Dream-ის მთავარ გასაღებს წარმოადგენს.

Burridge იხსენებს, რომ მათი მუსიკალური დაახლოება შემთხვევითი არ ყოფილა. კოლაბორაციის იდეით ბრიტანელი მუსიკოსი მაშინ დაინტერესდა, როდესაც აღმოაჩინა, რომ პატრიკი საველე ჩანაწერებით იყო გატაცებული და ეგზოტიკური ცხოველების ხმებს აგროვებდა. 

“შემდეგ უკვე ბელგიაში შევხვდით ერთმანეთს და მე ის სახლში დავპატიჟე, რათა მუსიკალურ იდეებზე ერთად გვემუშავა, რისი შედეგიც აღმოჩნდა ‘Stand Up Right’ და ‘No Wicked For The Rest’-ის დემო ვერსიები.” - Lost Desert იხსენებს, რომ 2015 წელს დაწყებული თანამშრომლობა ძალიან ბუნებრივად განვითარდა და თავისი გზაც იპოვა. 2019 წელს არტისტებმა კოლაბორაციული ალბომი Melt გამოსცეს, ბოლო თანამშრომლობა კი ლეიბლის კომპილაციურ ალბომში Lost Desert & Friends III შედგა.

საინტერესო ისტორია აქვს ასევე Amonita-ს, რომელსაც მსმენელი All Day I Dream და Anjunadeep-თან თანამშრომლობით იცნობს. ამ უკანასკნელ ლეიბლზე ის განსაკუთრებით დაუახლოვდა Makebo-ს, ვისთან ერთადაც პლატფორმა Rubicunda Music შექმნა. მისი მუსიკა ხშირად Organic House-ს ქოლგის ქვეშ მოიაზრება, რაც “სოციალური სივრცის” ატმოსფეროში განსაკუთრებით საინტერესოდ ჟღერს. რაც შეეხება Fulltone და Jim Rider-ს, მათი დებიუტი საქართველოში სწორედ შეკვეთილში შედგება. 

“სოციალური სივრცის” ინიციატივით All Day I Dream-ის საქართველოში ვიზიტი უკვე საინტერესო ტრადიციად იქცა, რაც საინტერესო ნიადაგს ქმნის როგორც ახალი მუსიკალური ექსპერიმენტებისთვის, ასევე საფესტივალო კულტურის განვითარებისთვისაც.

აღნიშნული ღონისძიება საქართველოში Starring Georgia-ს ფარგლებში ხორციელდება. კამპანიის მთავარი მიზანია, ხელმისაწვდომი გახადოს ქართველი ახალგაზრდებისთვის საკუთარ ქვეყანაში მათი საყვარელი მუსიკოსების მოსმენა, განავითაროს ქვეყნის გასართობი ინდუსტრია. Starring Georgia 2024-ის ფარგლებში შეკვეთილს უკვე ეწვივნენ OneRepublic და Scorpions, სეზონზე კი დამატებით სამი ღონისძიება Jungle, All Day I Dream და ერისიონია დაგეგმილი.

ავტორი: რევაზ ხუნწელია