მარტივი, სწრაფი და თანმიმდევრული გამოცდილება - დღეს კომუნიკაციის განსაკუთრებით მნიშვნელოვანი კომპონენტებია. სწორედ ამ მიზნით შეიქმნა TBC x, რომელიც ქმნის და უზრუნველყოფს იმ ერთიანობას, რაც მრავალფეროვანი ციფრული ეკოსისტემის წარმატებით ფუნქციონირებისთვისაა საჭირო.  

ამ ბლოგში თემო დოლიძე, TBCx-ის დიზაინ სისტემის გუნდის ლიდერი, მისი გუნდის წევრებთან ერთად გვიყვება, როგორ მუშაობს დიზაინის სისტემა, რა ღირებულებას ქმნის ის დიზაინერებისთვის, დეველოპერებისთვის და სხვა გუნდის წევრებისთვის, როგორია მისი სტრუქტურა და მართვის მოდელი და რატომ არის TBCx ბევრად მეტი, ვიდრე მხოლოდ ტექნიკური ბიბლიოთეკა. 

რა არის და რატომ შეიქმნა TBC X?

როგორ არის სისტემის სტრუქტურა მოწყობილი? 

TBCx-ის ცენტრალური რგოლია Foundation library (ფუნდამენტური ბიბლიოთეკა). ეს არის ძირითადი ბირთვი, რომელიც აერთიანებს ისეთ ელემენტებს როგორიცაა: ფერები, სიმბოლოები, ტიპოგრაფია, სივრცეები, ფორმები და ანიმაციის წესები. ეს ის საწყისი ელემენტებია, რითაც შემდგომ კომპონენტებს ვქმნით. 

კომპონენტი არის დიზაინის მრავალჯერადი ნაწილი - ღილაკები, ფორმები და სხვა ელემენტები, რომლებიც ქმნიან ინტერფეისს. ეს კომპონენტები თავმოყრილია რამდენიმე ბიბლიოთეკაში, რომელიც ემსახურება სხვადასხვა პროდუქტსა და პლატფორმას. ზოგი ბიბლიოთეკა შექმნილია კონკრეტული დავალებისთვის, ხოლო ზოგი კი ადაპტირებულია შესაბამის გარემოზე.

ბიბლიოთეკაში სისტემის ყველა ნაწილი საბაზისო ელემენტებიდან კომპონენტებამდე დეტალურად არის აღწერილი. ასე უზრუნველვყოფთ, რომ TBCx-ის ყველა მომხმარებელმა იცოდეს, როგორ გამოიყენოს სისტემა სწორად და შეინარჩუნოს კონსისტენტურობა. 

რა სახის დოკუმენტაცია და სახელმძღვანელოები შედის TBCx-ში? 

დიზაინ სისტემაში დოკუმენტაცია მნიშვნელოვანი როლს ასრულებს, ამით უზრუნველვყოფთ, რომ ყველას ჰქონდეს სწორი ცოდნა და ინსტრუმენტების ეფექტურად გამოყენების შესაძლებლობა.  

ყველა მნიშვნელოვან სისტემის ნაწილს აქვს თავის შესაბამისი დოკუმენტაცია, ამის პარალელურად, გუნდების მხარდასაჭერად გვაქვს სხვადასხვა დამატებითი სახელმძღვანელო, რომლებიც საუკეთესო პრაქტიკებზეა დაფუძნებული. 

მაგალითად: 

• Foundation Library - ფუნდამენტური ბიბლიოთეკის სახელმძღვანელო, რომელშიც აღწერილია ბიბლიოთეკის ყველა ელემენტის დეტალი.

• UX წერის სახელმძღვანელო გუნდებს ეხმარება, შექმნან მკაფიო, მარტივად გასაგები და ეფექტური ტექსტები. ის უზრუნველყოფს, რომ კომუნიკაცია ყოველთვის მომხმარებელზე ორიენტირებული და თიბისის საუბრის ტონთან შესაბამისი იყოს. 

• იკონოგრაფიის სახელმძღვანელო რომელიც ეხმარება დიზაინის სისტემის მომხმარებლებს შექმნან სიმბოლოები, რომლებიც, ვიზუალურ მიმზიდველობასთან ერთად სტილისტურადაც შეესაბამება დანარჩენ სიმბოლოებს.  

სახელმძღვანელოებით სარგებლობა უზრუნველყოფს, რომ ყველა ელემენტი სისტემაში ჰარმონიულად და თანმიმდევრულად მუშაობდეს. დიზაინ სისტემის გუნდი პერიოდულად მასპინძლობს შეხვედრებსა და ვოორქშოპებს სხვადასხვა გუნდების ჩართულობით, ეს უზრუნველყოფს იმას რომ დიზაინ სისტემის სერვისით სარგებლობა უფრო მარტივი და ხელმოსაწვდომი გახდეს ყველა ჩართული მხარისთვის. 

ვისთვის არის TBC X?

TBCx ძირითადად კომპანიის დიზაინერებისა და დეველოპერებისთვის არის შექმნილი. ისინი ეყრდნობიან სისტემას, რათა შექმნან ხარისხიანი და თანმიმდევრული ციფრული გამოცდილება. თუმცა ეს მხოლოდ ამით არ მთავრდება, TBCx-ით სარგებლობენ პროდუქტის მფლობელები, მარკეტერები, მკვლევრები და ბევრი სხვა მიმართულების წარმომადგენელიც.

გიზიარებთ იმ სარგებელს, რომელსაც TBCx-ის გამოყენება იძლევა:

სისწრაფე: უკვე მზა კომპონენტების გამოყენებით, გუნდებს შეუძლიათ მყისიერად ააწყონ დიზაინი და გამართონ დეველოპმენტი. ეს ნიშნავს მიწოდების სისწრაფის გაზრდას ხარისხის შემცირების გარეშე.

ფოკუსი: TBCx ამცირებს დიზაინის რესურსებზე ზეწოლას. დიზაინერები დროს აღარ ხარჯავენ მარტივი ელემენტების თავიდან გამოგონებაზე და მეტ ყურადღებას უთმობენ უფრო მნიშვნელოვან და კომპლექსურ ამოცანებს.

კომუნიკაცია: ავითარებს საერთო ენას გუნდსა და მომიჯნავე რგოლებს შორის. ეს აუმჯობესებს თანამშრომლობასა და კომუნიკაციას მრავალფუნქციურ გუნდებში.

კონსისტენტურობა: უზრუნველყოფს ვიზუალურ თანმიმდევრულობას არა მხოლოდ პროდუქტსა და პლატფორმებს შორის არამედ სხვადასხვა არხებსა და დეპარტამენტებში.

როგორია სისტემის მართვის მოდელი და შეუძლიათ თუ არა სხვა გუნდებს მასში მონაწილეობა? 

რა თქმა უნდა შეუძლიათ, TBCx ფედერაციული სტრუქტურით მუშაობს. 

დიზაინ სისტემის გუნდი პასუხისმგებელია მის ჩამოყალიბების, განვითარებისა და მართვის პროცესებზე. ეს მოიცავს საბაზისო კომპონენტების შექმნასა და პლატფორმის ბიბლიოთეკების შენარჩუნებას. 

დიზაინ სისტემის გუნდი მართავს ძირითად კომპონენტებს, თუმცა პროდუქტის ბიბლიოთეკები იქმნება და იმართება პროდუქტის გუნდებისგან. თითოეული გუნდი ქმნის კომპონენტებს, რომლებიც მათ პროდუქტს შეესაბამება, თუმცა ეს არ ხდება იზოლირებულად. 

ახალი კომპონენტის შექმნისას, პროდუქტის გუნდები მხოლოდ თავიანთ საჭიროებებზე არ ზრუნავენ და ითვალისწინებენ იმასაც, რა შეიძლება დასჭირდეთ სხვა გუნდებს. ისინი თანამშრომლობენ კოლეგებთან მთელი კომპანიის მასშტაბით, რათა შეიმუშაონ უნივერსალური მეთოდები, რომლის გამოყენებაც სხვადასხვა პროდუქტში იქნება შესაძლებელი. ასეთი მიდგომა გუნდებს აძლევს სრულყოფილ გავლენას თავიანთ პროდუქტებზე და ამასთან თავისუფლებას, რათა უზრუნველყონ საერთო დიზაინ პრინციპების არსებობა, დიზაინ სისტემის გუნდი ამ პროცესის მართვასაც ეხმარება. 

რას ეტყოდით ადამიანებს, ვინც ახლა იწყებს მუშაობას TBCx-თან? 

ეს მხოლოდ დასაწყისია, ყველაფერი, რაც აქ მოკლედ მოგიყევი (და კიდევ უფრო მეტი), შეგიძლია ნახო საერთო დოკუმენტში, რომელსაც "Gamarjoba" ჰქვია. ასევე შეგიძლია უყურო დემო ვიდეო გაიდებს TBCx დიზაინ სისტემაში უკეთ გასარკვევად. (ამ ეტაპზე ინგლისურ ენაზეა ხელმისაწვდომი). 

იხილე ვიდეო გაიდები, დაათვალიერე დოკუმენტი დეტალურად და ნახე, როგორ შეგიძლია გამოიყენოთ TBCx მაქსიმალურად შენთვის და შენი პროდუქტისთვის.